Google Ads va Yandex Direct’ni sozlash va yuritish

Bizga reklama bo‘yicha kelganlarning ko‘pchiligi bir xil xatoni takrorlaydi: kampaniya ishlaydi, pul sarflanadi, lekin nechta ariza kelgani noma’lum. Sababi oddiy: O‘zbekistonda mijoz ko‘pincha forma to‘ldirmaydi, u Telegram tugmasini bosib yozadi. Agar bu bosish konversiya sifatida hisobga olinmasa, Google va Yandex qaysi so‘rov arizani olib kelganini bilmaydi va byudjetni ko‘r-ko‘rona taqsimlaydi.

Shuning uchun har bir loyihani reklama kabinetidan emas, analitikadan boshlaymiz: forma, qo‘ng‘iroq, Telegram’ga o‘tish, hammasi GA4 va Yandex Metrika’da maqsad bo‘lishi kerak.

Google yoki Yandex. O‘zbek tilidagi so‘rovlar deyarli butunlay Google’da. Yandex rus tilida so‘zlashuvchi auditoriyani olib keladi, Toshkentda u hali ham sezilarli. Ko‘pincha ikkalasini ham ishga tushiramiz, keyin bir oy ichida ariza narxi qayerda arzonroq ekanini ko‘ramiz.

Landing reklamaning yarmi. Eng yaxshi e’lon ham odamni hech narsa tushunarsiz bosh sahifaga olib borsa, foyda bermaydi. Biz reklama trafigi uchun mo‘ljallangan sahifalar qilganmiz. Mezon Ta’lim o‘quv markazi uchun to‘rtinchi oqimga qabul landingi: bitta taklif, uch xil matn (o‘zbek lotin, kirill va rus), arizalar Telegram’ga. IBN Express uchun (AQShda avtomobil tashish) birinchi ekranda ikki ZIP kod bo‘yicha darhol narx hisoblash, ariza esa savdo bo‘limining Telegram kanaliga tushadi. Bunday sahifa so‘rovga aniq javob beradi va reklamaga ketgan pul behuda ketmaydi.

Minus-so‘zlar pulni tejaydi. Har bir sohada keraksiz so‘rovlar bor. Masalan, «sayt yaratish» bo‘yicha reklamaga «bepul», «o‘zim», «darslik», «ish» so‘zlari bilan so‘rovlar tushadi. Birinchi haftalarda qidiruv so‘rovlari hisobotini har kuni ko‘rib chiqamiz va bunday so‘rovlarni o‘chiramiz.

Nega birinchi ikki hafta eng muhim. Ishga tushgandan so‘ng tizimlar e’lonlarni keng doiradagi so‘rovlarga ko‘rsatadi va byudjetning bir qismi muqarrar ravishda keraksiz bosishlarga ketadi. Aynan shu davrda kabinetga eng ko‘p kiramiz: iboralarni o‘chiramiz, stavkalarni to‘g‘rilaymiz, bosilmayotgan e’lonlarni qayta yozamiz. Bu davrda reklamani nazoratsiz qoldirsangiz, odatda birinchi oy eng qimmat bo‘lib chiqadi.

Byudjet haqida. Reklama byudjetini siz Google va Yandex’ga to‘g‘ridan-to‘g‘ri, o‘z akkauntingizdan to‘laysiz, biz faqat ishimiz uchun pul olamiz. Bizning tajribamizda bitta yo‘nalish uchun oyiga $300 dan kam byudjet xulosa chiqarish uchun juda kam ma’lumot beradi. Bu qoida emas, raqobat sohaga bog‘liq: yurist yoki ko‘chmas mulk uchun bosish narxi kafe yoki kurslarnikidan ancha qimmat.

Narxlar. Google Ads yoki Yandex Direct’ni sozlash va yuritish oyiga $250 dan. Ikkala tizim birga oyiga $400 dan. Ishga tushirish 5–7 ish kuni. Landing hali yo‘q bo‘lsa, uni $800 dan yaratib beramiz.

Kampaniyangizni ko‘rib chiqishimizni xohlasangiz, Telegram’da @Azamat_yamin’ga yozing.